Бүгүн, 8-июлда, Чүй облусунун Сокулук районундагы Жаңы-Жер ЖДПБда эмчек рагы жана жатын моюнчасынын рагы боюнча скрининг программасы башталды.
Иш-чара КР Саламаттык сактоо министринин убактылуу милдетин аткаруучу Жаркынбек Касымбековдун, КР ЖК депутаты Айбек Маткеримовдун, өнүктүрүү боюнча өнөктөштөрдүн, жергиликтүү бийлик өкүлдөрүнүн ж.б. катышуусу менен өттү.
Программа рак ооруларын диагностикалоо жана дарылоо мүмкүнчүлүгүн кеңейтүүгө багытталган, анын максаты кийинки үч жылдын ичинде 60,000 аялды текшерүү.
“Эмчек рагын жана жатын моюнчасынын рагын эрте аныктоо алдын алуунун негизги багыттарынын бири болуп саналат”, — деп белгиледи, Сокулук районунун ЖДПБнын директору Китаева Венера Шаршеновна.

“Бул Кыргызстандын өлүмгө алып келүүчү ооруну жок кылуу боюнча негизги аракеттердин бир учуру, анткени ал коомдук саламаттык сактоо системасында натыйжалуу скринингге өбөлгө түзөт жана Сокулук районунан тышкары жерлерде алдын алуунун масштабын кеңейтүү үчүн үлгү болот”.

КР Саламаттык сактоо министрлиги менен биргелешкен “Чек арасыз дарыгерлер” долбоорунун программасында онкологиялык ооруларды текшерүү, амбулатордук дарылоо, ошондой эле жыныстык жол менен жугуучу инфекцияларды дарылоо жана үй-бүлөнү пландаштыруу боюнча консультациялар сунушталат. Бул Улуттук онкология жана гематология борбору менен, айрыкча, бейтаптардын аялуу топторуна кеңейтилген изилдөө жана дарылоону камсыз кылуу максатында кызматташат. Ошондой эле, рак диагнозу коюлган аялдарды коштоп жүрүү үчүн психикалык саламаттык боюнча кеңеш берилет.

“Скринингдик кызматтарды колдонууда аялдарга көбүрөөк мүмкүнчүлүк берүү максатында биз райондук саламаттыкты сактоо органдары менен Сокулук районунун аймагында дарылоо мекемелеринин базасында жаңы борборлорду ачуу боюнча иштеп жатабыз”, — деди долбоордун жетекчиси Андреа Изенеггер.

“Бул биргелешкен программа Кыргызстанда эмчек жана жатын моюнчасынын рак ооруларын алдын алуу масштабын кеңейтүү үчүн үлгү боло алат деп ишенебиз. Бул скрининг иш-чараларын кеңейтүүгө жана онкологиянын алдын алуу аракеттерин тездетүүгө мүмкүндүк берет”.
Сүт безинин рагы жана жатын моюнчасынын рагы Кыргызстандагы аялдар арасында эң көп кездешкен эки рак оорусунун катарына кирет.