Коргошундуу боек менен капталган керамикалык идиштер

Керамикалык идиштердин кээ бир түрлөрүнүн жасалгасында же боёгунда коргошун болушу мүмкүн. Ал идишти жылтыратуу, ачык түсүн камсыздоо жана бекемдигин камсыз кылуу үчүн колдонулат. Ысык же кычкыл азыктар куюлган учурда коргошун тамак-ашка өтүп кетиши мүмкүн.

Коопсуз колдонуу жолдору:

•          Кургак азыктарды (мисалы, дан азыктарын, жаңгактарды) сактоо үчүн колдонсо болот.

•          Кооздоочу буюмдар, вазалар жана кооздук гүлдөр үчүн идиш катары колдонсо болот (!!! бирок тамак-ашка колдонула турган же дары-дармек жасоо үчүн колдонула турган өсүмдүктөр үчүн эмес).

Колдонулушу кооптуу жолдор:

•          Ысык, кычкыл же майлуу тамак-аш үчүн колдонууга болбойт, анткени коргошун тамакка өтүп кетиши мүмкүн.

•          Суюктуктарды (өзгөчө ширелерди, шарапты, кымызды, ачытылган суусундуктарды) сактоо үчүн колдонууга болбойт.

•          Тамак бышыруу үчүн колдонбоо керек – ысытуу коргошундун бөлүнүп чыгышын күчөтөт.

Алюминий казандар (коргошун аралашмасы менен)

Алюминий казандардын курамында коргошун болушу мүмкүн, эгерде аны өндүрүү үчүн унаа кыймылдаткычтарынын бөлүктөрүнөн, поддондордон, дисктерден жана башка сыныктардан алынган металл колдонулса.

Мындай материал тамак-аш идиштери үчүн колдонулушу кооптуу жана курамында зыяндуу кошулмалар, анын ичинде коргошун болушу мүмкүн. Бул уулуу металлдын кооптуу деңгээли идишти колдонгон же анда бышырылган тамакты жеген адамдын уулануусуна алып келиши мүмкүн.

Өзүңүздү коопсуз сезүү үчүн, аноддолгон алюминийден жасалган идиштерди тандоо сунушталат: алар аноддук кычкылданууга дуушар болушат, натыйжада бетинде алюминийдин кычкылдануусун жана анын азыктарга жана адамдын организмине кирип кетишинин алдын алган бекем коргоочу катмар пайда болот.

Коопсуз колдонуу жолдору:

Декоративдик элемент катары же кургак азыктарды сактоо үчүн колдонсо болот (эгерде казан ысытылбаса жана нымдуу чөйрөдө колдонулбаса).

Колдонулушу кооптуу жолдор:

•          Мындай казандарда тамак бышырууга таптакыр болбойт, анткени ысытуу учурунда зыяндуу заттар тамакка өтүп кетиши мүмкүн.

•          Суюктуктарды сактоо үчүн колдонууга болбойт – нымдуулук коргошундун эрип чыгышына өбөлгө түзөт.

Сунуш: Эгерде казан жаңы болсо же белгисиз өндүрүүчүдөн сатылып алынган болсо, анын курамындагы коргошунду атайын тесттердин жардамы менен текшерип көргөн оң. Аны текшерилген алюминийден же чоюндан жасалган сапаттуу казанга алмаштырганыңыз жакшы.

Коргошундуу фарфор идиштери (анын ичинде сервиздер)

Коопсуз колдонуу ыкмалары:

•          Кургак азыктарды сактоо үчүн же кооздук максатында колдонсо болот.

•          Муздак тамактарды берүү үчүн колдонсо болот (эгерде коргошун тамакка өтпөйт деген ишеним болсо, бирок коопсуз идишке алмаштырган жакшы).

Колдонулушу кооптуу жолдор:

•          Ысык суусундуктар жана тамактар үчүн колдонбоңуз, анткени жылуулук коргошундун бөлүнүп чыгышына өбөлгө түзөт.

•          Кычкыл суусундуктар үчүн колдонбоңуз (лимон кошулган чай, мөмө-жемиш суулары, ширелер, шарап).

•          Балдарга жана кош бойлуу аялдарга бербеңиз – алар коргошундун таасирине өзгөчө сезгич келишет.

Коргошун – бул адамдын организминде топтолуучу мүнөзгө ээ уулуу металл. Ал адамдын ден соолугуна, өзгөчө балдардын саламаттыгына олуттуу зыян келтирет.